شعر نمر بن عدوان البارحه يوم الخلايق نياما ..

بسم الله الرحمن الرحيم

شاعرنا هو..

الشيخ نمر بن عدوان الصخري من شيوخ (( بنى صخر )) قبيلة عربية مشهورة مواطنها الآن شرقي الأردن - شاعر علم - كان الشاعر أميراً للبلقاء اشتهر بنبله وكرمه وسجاياه الحميدة ..<< يعني باختصار أجودي


وقصت القصيده هذه.

توفيت زوجته وضحى وصار يكتب فيها قصايد يرثيها ويتحسّر عليها لأن زواجهم كان له سبع سنوات وعمره ما شاف منها شي شين .. بالعكس كان سعيد جداً معها .. وفجأة توفّت .. وفاتها كانت غريبة جداً .. يقولكم وضحى متعودة تحلب الناقة لزوجها قبل لا يجي بشوي عشان يشربه وهو طازج .. الزبدة انه بذيك الليلة جا بدري شوي وشاف خيال شخص عند النياق حقتهم فقام وصوبه بسهم لأنه ظن انه خيّال بيسرق من نياقهم .. واذا بالخيّال هذا هو وضحى وماتت في حينها طبعاً

<<حزني وربي



وفي كل الحالات نتج عن موتها قصايد حزينة وتقطع القلب ..

وهذه وحده من القصايد اللي قالها فيها..






البارحة يوم الخلايق نياما
بيحت من كثر البكا كل مكنون

قمت اتوجد له وانثر الماء على ما
من موق عين دمعها كان مخزون

ولي ونة من سمعها مايناما
كني صويب بين الأضلاع مطعون

وإلا كما ونة كسير السلاما
خلوه ربعه للمعادين مديون

في ساعة قل الرجا والمحاما
في ما يطالع يومهم عنه يقفون

وإلا كما ونة راعبية حماما
غاد ذكرها والقوانيص يرمون


تسمع لها بين الجرايد حطاما
من نوحها تدعي المواليف يبكون

وإلا خلوج سايبه للهياما
على حوار ضايع في ضحى الكون

وإلا حوار نشقوله شماما
وهي تطالع يوم جروه بعيون

يردون مثله والظوامي سياما
ترزموا معها وقاموا يحنون

وإلا رضيع جرعوه الفطاما
توفت امه قبل اربعينه يتمون

عليك يا شارب لكاس الحماما
صرف بتقدير من الله مأذون

جاه القضاء من بعد شهر الصياما
صافي الجبين بثاني العيد مدفون

كسوه من بيض الخرق ثوب خاما
وقاموا عليه من الترايب يهلون

راحوا بها حروة صلاة الاماما
عند الدفن قاموا لها الله يدعون

برضاه والجنه وحسن الختام
ودموع عيني فوق خدي يهلون

حطوه في قبر غطاه الهداما
في مهمة من عرب الامات مسكون

يا حفرة يسقي ثراك الغماما
مزن من الرحمة عليها يصبون

جعل البختري والنفل والخزاما
ينبت على قبر به العذب مدفون

مرحوم يالي ما مشي بالملاما
جيران بيته راح مامنه يشكون

يا وسع عذري وأن هجرت المناما
ورافقت من عقب العقل كل مجنون

أخذت أنا وياه سبعة اعواما
مع مثلهن في كيف مالها لون

والله كنة يا عرب صرف عاما
ياعونة الله صرف الأيام وشلون

وأكبر اهمومي من بزور يتاما
وإن شفتهم قدام وجهي يصيحون

وأن قلت لا تبكون قالوا علاما
نبكي ويبكي مثلنا كل محزون

لاقلت وش تبكون قالوا يتاما
قلت اليتيم اياي وانتم تسجون

قمت اتشكا عند ربع اعدامــا
وجوني على فرقا خليلي يعزون

قالوا تزوج وانس لامه بلاما
ترى العذارى عن بعضهم يسلون

قلت إنها لي وفقت بالولاما
ولو جمعتم نصفهن ما يسدون

ما ظنتي تلقون مثله حراما
ايضا ولا فيهن على السر مامون

وأخاف أنا من غاديات الذماما
اللي على ضيم الدهر ما يتاقون

أو خبلة ما عقلها بالتماما
تضحك وهي تلذغ على الكبد بالهون

توذي عيالي بالنهر والكلاما
وانا تجرعني من المــــر بصحون

والله لولا هالصغار اليتاما
وخايف عليهم من الدجه يضيعون

لقول كل البيض عقبة حراما
واصبر كما يصبر على الحبس مسجون

عليه مني كل يوم سلاما
عدة حجيج البيت واللي يطوفون

وصلوا على سيد جميع الاناما
على النبي يللى حضرتوا تصلون





ويقولون انه تزوج بعدها 99 مرة يدور مثلها ولا لقى .. وتوفى وهو ما تجاوز الأربعين ..



بالنسبة للقصيدة .. اختلفت الروايات فيها .. فمنهم من يقول القصيدة لـ نمر بن عدوان

ومنهم من يقول أنها لغيره ..

على العموم
قصة نمر بن عدوان ووضحى حزينه جدا ..
ولها عدة روايات أيضا ..

منها الرواية أن وضحى عودت الشيخ نمر انه اذا جاء بالليل تربط الخيل وتدلك ظهره قبل ينام وفي ليله من الليالي نست تربط الخيل ..
المهم ان الشيخ قبل تدلكه.. سئلها وقال ربطتي الخيل ياوضحى..
خافت انه يزعل لودرى انها ماربطته ..وقالت ايه ياشيخ ربطته
ونام الشيخ نمر عشان تدلكه ولكنها ماجت..وفجأه سمع صوت احد عند الخيل ..اخذ سلاحه وراح يشوف.. وفي الظلام .. حس بحركه غريبه ورمى بالسلاح تجاه الشخص اللي عند الخيل
يوم راح يشوف من اللي عند الخيل إكتشف إنها حبيبة قلبه وضحى
قام يصيح جمبها ويقول وش جابك ياحرمه وش مطلعك..
قالت وضحى وهي تبتسم..ذبحتني يانمر..
قال الشيخ نمر :اناماذبحتس انتي اللي ذبحتيني....
وماتت وضحى..و من يومها وهو يكتب القصائد المرثيه اللي تقطع القلب من شدة حزنه عليها..
وقال هذه القصيدة في رثاء زوجته ..

قبل وفاة نمر بكم شهر كان جالس يوننن ويبكي على وضحى..وجاه ولده عقاب وقال

يابوي انت وش يبكيك ...
قال نمر امك امك امك
قال يابوي امي ريحتها غنم...(يبغاه يسلى)
قال الشيخ نمر..هذا بلى ابوك ياعقاب ومن هنا طلع هالمثل المشهور.....

هذه القصة في نهايات القرن الثالث عشر الهجري .. حيث توفى نمر بن عدوان عام 1300هـ .. اي قبل 128 عام فقط